Shoqëria është stabile kur gratë e burrat kanë mundësi të barabarta

Themelet e një shoqërie stabile janë shumë më të forta nëse gratë dhe burrat vërtet kanë mundësi të barabarta, tha të mërkurën Përfaqësuesi Special i Bashkimit Evropian në Kosovë, Pieter Feith, i cili së bashku me shefin e EULEX-it, Xavier Bout de Marnhac dhe shefin e Zyrës Ndërlidhëse të Komisionit Evropian, Renzo Daviddi, ishin nikoqir të një ceremonie të organizuar me rastin e 10 vjetorit të Rezolutës së Këshillit të Sigurimit të Kombeve të Bashkuara për Gratë, Paqen dhe Sigurinë.
Kjo rezolutë thekson rëndësinë e pjesëmarrjes së barabartë dhe të plotë të grave si veprimtare aktive në parandalimin dhe zgjidhjen e konflikteve, negociatat për paqen, ndërtimin e paqes, ruajtjen e paqes, reagimet humanitare dhe në rindërtimin pas-konfliktit.

“Mbështetja dhe përfshirja e grave në gjetjen e zgjidhjeve është me rëndësi vendimtare jo vetëm për arritjen e paqes dhe të sigurisë së qëndrueshme, por edhe për ndërtimin e një demokracie stabile që e çon Kosovën drejt të ardhmes së saj evropiane”, tha Feith.

Ndërsa shefi i EULEX-it, de Marnhac, tha se dhuna në familje dhe krimet seksuale janë krime që duhet të ndiqen penalisht. Ai tha se EULEX-i do të vazhdojë të punojë ngushtë me institucionet e Kosovës për të siguruar që Rezoluta 1325 e KS së KB-ve të mos mbetet vetëm premtim, dhe se shqetësimet e ngritura nga organizatat kosovare të grave të adresohen.