Topi kërkoi zgjerimin e gjeografisë së vendeve, që duhet të njohin Kosovën

Londër, 4 nëntor - Presidenti i Shipërisë, Dr. Bamir Topi, ka vizituar mjediset e Universitetit të Oxfordit, në kuadër të vizitës Britanisë së Madhe. Presidenti Topi ka vlerësuar lart rolin që Universiteti i Oxfordit dhe stafet akademike kanë dhënë në edukimin e udhëheqësve të shquar botërorë dhe në zhvillimin e aftësive të brezave të tërë intelektualësh dhe personalitetesh të fushave të ndryshme, të cilët në momente kyçe të zhvillimit shoqëror kanë qenë në ballë të debatit ndërkombëtar. Në ligjëratën e tij presidenti Topi, pasi nënvizoi edhe një herë marrëdhëniet e shkëlqyera bilaterale mes Shqipërisë dhe Mbretërisë së Bashkuar, bëri një përshkrim të situatës politike dhe ekonomike në vend. Ai u përqendrua në evidentimin e arritjeve të Shqipërisë në kuadër të integrimit në Bashkimin Evropian dhe atmosferën optimiste të krijuar pas miratimit të raportit për liberalizimin e vizave. Në këtë kontekst presidenti Topi ofroi një panoramë të detajuar të ndryshimeve rrënjësore që ka pësuar rajoni i Ballkanit, sidomos pas shpalljes së pavarësisë së Kosovës dhe përballjes me një realitet të ri gjeopolitik. "Shteti i ri, multietnik dhe demokratik i Kosovës ka kontribuar ndjeshëm në rritjen dhe konsolidimin e paqes dhe qëndrueshmërisë në rajon, duke bërë që Ballkani të shkëputet përfundimisht nga e kaluara e turbullt e mbushur edhe me konflikte ndëretnike dhe të orientohet i gjithi drejt integrimit euroatlantik dhe zhvillimit ekonomik" - vuri në dukje kreu i Shtetit shqiptar, duke theksuar nevojën dhe rëndësinë në këtë drejtim të zgjerimit të gjeografisë së vendeve, që duhet të njohin pavarësinë e Kosovës. Në këtë aspekt presidenti Topi theksoi rolin e rëndësishëm dhe moderator të Shqipërisë dhe faktorit shqiptar në rajon për konsolidimin e paqes dhe qëndrueshmërinë e saj si dhe ndërtimin e marrëdhënieve dhe të një bashkëpunimi të frytshëm rajonal.
Më pas presidenti Topi iu përgjigj pyetjeve dhe interesimit të të pranishmëve të shumtë lidhur me situatën në rajonin e Ballkanit dhe të ardhmen e vendeve të tij, mbi përvojat personale si shkencëtar, si politikan dhe kryetar shteti dhe rrugëtimin e sigurt integrues të Shqipërisë drejt Bashkimit Evropian.