Bisedimet me Serbinë nisin këtë muaj për kufirin

Autoritetet ushtarake serbe kanë kërkuar nga komandanti i KFOR-it, Erhard Buhler që të bisedojnë ndryshimin e vijës kufitare në mes Kosovës dhe Serbisë.
Lajmin e ka bërë të ditur për gazetën Koha Ditore një burim ndërkombëtar, sipas të cilit takimi i parë do të zhvillohet këtë muaj në Nish të Serbisë.

“Takimi do të mbahet më 18 nëntor dhe do të zhvillohet në Nish. Ky takim do të mbahet me kërkesë të autoriteteve ushtarake serbe, të cilat kanë kërkuar që të ndryshohet vija kufitare me Kosovën, ajo vijë që është caktuar sipas Marrëveshjes së Kumanovës”, ka thënë ky burim për Kohën Ditore.

Sipas tij, për këto bisedime janë njoftuar edhe autoritetet në Kosovë, e po ashtu është biseduar edhe në takimin që komandanti i KFOR-it ka mbajtur të premten me drejtorin përgjithshëm të Policisë së Kosovës, Reshat Maliqi.

Megjithëse, nuk e ka përmendur datën e bisedimeve, drejtori Maliqi të premten i ka përmendur bisedimet për vijën kufitare me komandantin e KFOR-it, Buhler.

Ndërkohë, ky burim ndërkombëtar ka sqaruar se pas takimit të parë që do të zhvillohet në Nish, komandanti pritet që t’i njoftojë përfaqësuesit e institucioneve të Kosovës për kërkesat e autoriteteve ushtarake serbe.

“Më pas pritet të caktohen edhe përfaqësuesit e dy shteteve që do të bisedojnë bashkë me komandantin e KFOR-it dhe me përfaqësuesit ushtarakë serbë”.

Ai ka sqaruar se për ndryshimin e vijës kufitare që është caktuar me Marrëveshje të Kumanovës, do të kihet për bazë harta e dalë nga Marrëveshja e Kumanovës, si dhe të gjitha hartat e tjera relevante që kanë ekzistuar në të kaluarën, por edhe ekspertët.

“Procesi do të jetë i gjatë dhe do të caktohen disa ekspertë për të vlerësuar se si duhet të bëhet ndryshimi i vijës, por ky ndryshim nuk do të jetë i madh, bëhet fjalë për distanca prej 50 euro deri në 100 metra nga të dy anët e vijës kufitare”, ka theksuar ai.