Gent Begolli u zgjodh kryetar i të rinjve të AAK-së

Kuvendi i Pestë Zgjedhor i Aleancës së të Rinjve të Kosovës (ARK) zgjodhi të shtunën Gent Begollin kryetar të të rinjve të Aleancës për ardhmerinë e Kosovës (AAK).
Konform procedurave statutare, kryetari i sapozgjedhur i të rinjve aleancistë është i mandatuar të nominojë Kryesinë dhe Nënkryetarët e ARK-së, të cilët do të votohen në Këshillin Drejtues të ARK-së.

Kuvendin V Zgjedhor të ARK-së e përshëndetën udhëheqës më të lartë të Kryesisë së AAK-së. Daut Haradinaj, duke uruar delegatët e pranishëm, ARK-në e vlerësoi si shtyllën kryesore të zhvillimit të strukturave dhe politikave të Aleancës për Ardhmërinë e Kosovës.

Kryetari i sapozgjedhur i ARK-së, Begolli, duke falënderuar delegatët për zgjedhjen e tij, ka thënë ky besim është një inkurajim i jashtëzakonshëm për të, në punën e mëtejme, tash në krye të ARK-së.

“Kosova ka nevojë më shumë se çdo gjë tjetër për një qeveri me mendësi tjetër. E kjo qeveri, me mendësi tjetër, ka adresë dhe emër. Kjo është Aleanca për Ardhmërinë e Kosovës dhe lideri ynë, z. Ramush Haradinaj. Me vendosmërinë, tonë, të nderuar të rinj, fitorja është e jona, kurse shteti i Kosovës do të jetë funksional dhe demokratik”, ka thënë, ndër të tjera kryetari i sapozgjedhur i Aleancës së të rinjve të Kosovës.