Thaçi: Konflikti në Maqedoni, që të bllokohej pavarësia e Kosovës

E kam thënë atëherë dhe tani e përsëris, segmente të caktuara të shërbimeve sekrete serbe e iniciuan 2001-shin. S’e them këtë vetëm unë, e ka thënë dhe Solana, Robertsoni, si dhe ambasadorët e Bashkimit Evropian, të cilët gjatë 2001 ishin në Shkup. Kështu ka deklaruar kryetari i PDSH-së, Menduh Thaçi, në një intervistë për Radion Evropa e Lirë.
“Unë do të kthehem te një intervistë e ambasadorit të Britanisë së Madhe, Mark Dikinson, për të përditshmen Fakti, në muajin maj, i cili deklaron se këta njerëz i ka dërguar Serbia. Problemi ishte që procesi i pavarësisë së Kosovës të bllokohet në çdo mënyrë. Vetëm t’ua përkujtoj se atë kohë destabilizimi në Preshevë nuk pati sukses dhe u bart në Maqedoni”, ka thënë Thaçi.

Ai sqaron se “Serbia punonte në mënyrë të përsosur në aspektin diplomatik dhe informativ që ta bindë botën e përparuar se shqiptarët nuk kanë kërkesa politike, por është një masë turbulente, e cila nuk njeh norma dhe standarde. Kjo masë, sipas tyre, nuk i njeh trendët e Bashkësisë Ndërkombëtare dhe pikërisht me këtë i komprometoi përgjithmonë kërkesat politike të shqiptarëve”.