Thaçi në Konferencën e OKB-së, kërkon njohjen e Kosovës

Në Konferencën e Katërt Ndërkombëtare të Vendeve më pak të Zhvilluara, e cila po mbahet në Stamboll të Turqisë, kryeministri Hashim Thaçi takoi sekretarin e Përgjithshëm të OKB-së, Ban Ki-moon dhe liderë të shteteve të ndryshme, që po marrin pjesë në këtë Konferencë.

Në këto takime, kryeministri Thaçi i informoi liderët e pranishëm për progresin e arritur në Kosovë, që nga shpallja e pavarësisë, duke theksuar se Kosova e pavarur është faktor i paqes dhe stabilitetit në rajon dhe me gjerë.

Thaçi nga liderët e vendeve që ende nuk e kanë njohur pavarësinë e Kosovë kërkoi që ta njohin shtetin e Kosovës dhe mori premtime inkurajuese në këtë drejtim, theksohet në një komunikatë të lëshuar nga Kryeministria.

“Kryeministri Hashim Thaçi takoi fillimisht kryeministrin e Turqisë, Recep Tayyip Erdogan, me ftesë të të cilit po merr pjesë në këtë konferencë ndërkombëtare. Kryeministri Thaçi po ashtu takoi Sekretarin e Përgjithshëm të OKB-së, Ban Ki Moon, kryeministrin e Nepalit, JhAla Nath Khanal, kryeministrin e Çadit, Emanuel Nedingar, zëvendëspresidentin e Tanzanisë, Muhamed Khaba Gharb Bilal, kryeministrin e Etiopisë, Meles Zenawi, ministrin e Jashtëm të Sudanit, Ali Ahmet Karti, Presidentin e Ishujve Komore, Ahmed Abdullah Muhamed Sambi”, thuhet ndër të tjera në komunikatë. /Telegrafi/