Pacolli kërkon njohjen e Kosovës nga Iraku

Presidenti i AKR-së, Behgjet Pacolli ka pritur në një takim pune përfaqësuesin e Këshillit suprem islamik të Irakut, Ali Al-Baldawi, me të cilin ka diskutuar rreth situatës politike në Kosovë, se çka praktikisht ka ndodhur që nga koha e përfundimit të luftës e deri në ditët e sotme.



Pacolli, siç thuhet në një kumtesë për media të AKR-së, ka kërkuar nga përfaqësuesi i Irakut që sa më shpejtë të bëhet njohja e shtetit të pavarur të Kosovës nga ana e këtij shteti.

Pacolli po ashtu ka theksuar se është në pritje të formimit të qeverisë së këtij vendi dhe se në një të ardhme shumë ai personalisht do të vizitojë Irakun me kërkesën për njohjen e Kosovës nga ky shtet.

Ndërsa, Al-Baldawi është zotuar se me kthimin e tij në Irak do të fillojë punën rreth vendosjes së marrëdhënieve miqësore me Kosovën. “Unë do t`a formoj një klub miqësor mes parlamentit Irakian dhe atij kosovar“, ka thënë ai, duke cekur se pas formimit të qeverisë së re Iraku do kërkojë edhe vendosjen e marrëdhënieve diplomatike mes dy shteteve.

Partia e Al-Baldawit në Irak, kishte dalë fituese pas zgjedhjeve të fundit nacionale të cilat janë mbajtur në mars të këtij viti, ndërkaq se shpejti pritet të përfundojë edhe procesi i formimit të qeverisë së re irakiane.