Hoxhaj kërkon njohjen nga Bosnja e Hercegovina

Ministri Enver Hoxhaj gjatë vizitës në Bosnjë dhe Hercegovinë në
takimin me ministrin e jashtëm të këtij vendi, Sven Alkalaj ka
parashtruar kërkesën për njohjen e pavarësisë.Gjatë takimit,
ministri i Jashtëm i Kosovës e ka informuar homologun boshnjak për
procesin e shtetndërtimit, reformat e brendshme, konsolidimin e
gjithanshëm të shtetësisë dhe proceset e pritura të anëtarësimit të
Republikës së Kosovës në organizatat ndërkombëtare.
Hoxhaj i ka parashtruar ministrit Alkalaj kërkesën për njohjen e
pavarësisë së Kosovës nga Bosnja e Hercegovina. Po ashtu, ka kërkuar nga
Qeveria boshnjake të pranojë dokumentet e udhëtimit të Republikës së
Kosovës.
Ministri i Jashtëm i Republikës së Kosovës, gjatë qëndrimit në
Sarajevë, ka takuar edhe shumë udhëheqës të partive politike, deputetë,
personalitete nga shoqëria civile dhe mediet boshnjake.
Gjatë takimit me kryetarin e Partisë Social-Demokrate të Bosnjës e
Hercegovinës, Zlatko Lagumdžija, Hoxhaj ka kërkuar nga kryetari i
socialdemokratëve boshnjakë që të ndikojnë në mënyrë që Bosnja dhe
Hercegovina sa më parë të njohë pasaportat e Kosovës.
Ministri i Jashtëm i Kosovës ka takuar edhe të dërguarin ndërkombëtar në Bosnjë e Hercegovinë, Valentin Inzko.
Hoxhaj ka zhvilluar një takim të veçantë edhe me Kryeministrin e
Malit të Zi, Igor Liksic, ku është diskutuar për thellimin e shumanshëm
të bashkëpunimit ndërmjet dy vendeve tona.
Në takim është biseduar për forcimin e marrëdhënieve bilaterale
ndërmjet Republikës së Kosovës dhe asaj të Malit të Zi, me theks të
posaçëm në proceset e përbashkëta integruese të dy shteteve fqinje. /Telegrafi/