KFOR-i ushtrohet për kontrollin e trazirave

Ferizaj, 15 nëntor - KFOR-i ka informuar se do të mbajë një ushtrim fushor për kontroll të trazirave të mërkurën në Kampin “Rigas Ferreros” afër Ferizajt me Batalionin taktik rezervë për manovra të KFOR-it.
Qëllimi i këtij ushtrimi, sipas Zyrës për Marrëdhënie me Publikun të KFOR-it, është që të ushtrohen dhe të përforcohen edhe më tej procedurat standarde operacionale mbi teknikat dhe taktikat. Ushtrimi është pjesë e një cikli trajnues, i cili ka për qëllim që të shtojë ndërveprueshmërinë dhe aftësitë e KFOR-it dhe të demonstrojë që KFOR-i është i aftë të reagojë ndaj çdo sfide, në çdo kohë dhe në çdo vend, pavarësisht nga reduktimi i trupave të veta.
Komandanti i KFOR-it, gjeneralmajori Erhard Bühler, do të jetë i pranishëm në trajnimin e batalionit të tij rezervë taktik dhe në mesditë në Kampin “Rigas Ferreros” do të mbajë një konferencë për media.
Me këtë rast për gazetarët që duan të përcjellin këtë aktivitet KFOR-i është përkujdesur që ata t’i bartë me autobus nga obelisku “Newborn”, deri te selia e Shtabit të Përgjithshëm të KFOR-it në Prishtinë, prej nga më pastaj do të bëjnë një fluturim me helikopter mbi qytetin e Prishtinës dhe për në Kampin “Rigas Ferreros”.