Forcat afgane marrin kontrollin në 7 zona

Kabul, 22 mars - Presidenti afgan, Hamid Karzai, ka caktuar shtatë zona të vendit në të cilat përgjegjësia për sigurinë do të kalojë në korrik nga trupat e NATO-s tek ato afgane.
Bëhet fjalë për provincat relativisht të qeta si Kabuli, Panjshiri, Bemijani dhe qytetet Herat, Mazar-e-Sharif dhe Mehtarlam.
Por, ai caktoi gjithashtu edhe Lashkar Gah, kryeqytet i provincës problematike të Helmandit.
Kalimi i kompetencave të sigurisë shihet si një hap kritik në tranzicionin e pushtetit, para se trupat e huaja t’u japin fund operacioneve në vitin 2014, transmeton TCH.
“Populli i Afganistanit nuk dëshiron që trupat e huaja të mbajnë më tej përgjegjësinë për sigurinë”, ka deklaruar Karzai.
Procesi i kalimit të kontrollit do të fillojë në korrik, kur është parashikuar tërheqja e trupave të para të huaja nga Afganistani.