Feith bën thirrje për zgjedhje të ndershme

Përfaqësuesi Special i Bashkimit Evropian, Pieter Feith përgëzoi partitë politike për nënshkrimin e Kodit të Mirësjelljes për zgjedhjet e 12 dhjetorit, ndërsa u ka bërë thirrje të gjithë qytetarëve të Kosovës që të shfrytëzojnë të drejtën e tyre demokratike për të votuar dhe zgjedhur ata përfaqësues që mendojnë se do të punojnë më së miri për interesin publik.
Përfaqësuesi i BE-së, Pieter Feith ka thënë me këtë rast se zgjedhjet e lira, të ndershme dhe të rregullta janë prioriteti më i lartë i Bashkimit Evropian dhe me këtë rast dëshirojnë t’i shohin zgjedhjet e ardhshme në Kosovë t’i kenë përmbushur standardet më të larta ndërkombëtare.

“Partitë politike kanë një rol të rëndësishëm në krijimin e një ambienti të mirë për zgjedhjet përmes sjelljeve të tyre. Përkrahja e Kodit të Mirësjelljes me vepra dhe me fjalë është një mënyrë për të demonstruar përkushtimin ndaj integrimit evropian”, ka thënë Fieth.

Ai po ashtu u ka bërë thirrje të gjithë qytetarëve të Kosovës që të shfrytëzojnë të drejtën e tyre demokratike për të votuar dhe zgjedhur ata përfaqësues që mendojnë se do të punojnë më së miri për interesin publik.

“Pjesëtarët e komuniteteve, posaçërisht të atij serb e kanë një rast të rëndësishëm për të arritur përfaqësim më të madh në këto zgjedhje. BE-ja, SHBA-të dhe partnerët ndërkombëtarë do ta ndihmojnë këtë proces me mekanizma të vëzhgimit”, ka thënë Feith.