BE: Thirrje urgjente për përmbajtje nga provokimet

Bruksel, 21 janar - Bashkimi Evropian i ka bërë thirrje liderëve politikë të Shqipërisë që të përmbahen nga provokimet e mëtejme dhe të ftojnë popullin të ruajë qetësinë. Në emër të BE-së, të premten një deklaratë të përbashkët për politikën shqiptare e kanë dhënë përfaqësuesja për politikë të jashtme e siguri, Catherine Ashton, dhe Komisionari për zgjerim, Stefan Füle.
“Shprehim keqardhje të thellë për humbjen e jetëve të njerëzve në kontekstin e protestave të sotme në Shqipëri. Protestat janë instrument i shprehjes së lirë dhe të drejtës për tubim paqësor të qytetarëve. Na vjen keq që protestat e sotme përshkallëzuan në dhunë”, thuhet në deklaratën e përbashkët të BE-së.
“Në mënyrë që Shqipëria të përparojë në rrugën e integrimeve evropiane ne edhe një herë u bëjmë thirrje politikanëve të Shqipërisë që të angazhohen në dialog konstruktiv politik dhe që pa asnjë vonesë ta zgjidhin ngërçin aq të gjatë politik dhe të mobilizojnë energjitë e vendit për këtë qëllim”, thuhet në fund të deklaratës.