Votat forcojnë gjuhën

Zgjedhjet e jashtëzakonshme të 12 dhjetorit, ende pa filluar zyrtarisht fushata elektorale, po japin sinjale se do të karakterizohen nga tensione më të larta sesa në zgjedhjet e kaluara.
Mënyra se si kanë ndodhur zhvillimet politike, produkt i të cilave ishte shpallja e këtyre zgjedhjeve, por edhe rritja e rivalitetit politik në vend, po përgatit atmosferën për përplasje të forta politike mes partive, shkruan e përditshmja “Zëri”.

Tashmë, mes zyrtarëve të subjekteve kanë filluar akuzat, disa prej të cilave goxha të rënda dhe që tejkalojnë caqet e gjuhës politike, duke u zhytur edhe në çështje personale e familjare. Kësaj radhe, gjuhën e ashpër duke se nuk do të mund të frenojë as Kodi i Mirësjelljes në zgjedhje dhe as apelet e liderëve ndërkombëtarë e fetarë.

Analisti Behxhet Shala la thënë se kjo fushatë pritet të jetë me tensione më të larta se zgjedhjet e kaluara. Por, Shala pret që të mos ketë eskalim të saj, në nivele të cilat do të shkaktonin kriza të rënda.

Sipas tij, gjuha e ashpër është më shumë treguese e mungesës së alternativave politike, sesa e raporteve mes partive.

“Por, është interesante se në këtë fazë ende ka më shumë tensione brenda vetë partive, sesa në raportet mes tyre. E kjo do të ndryshojë me fillimin e fushatës, por që nuk besoj se do të tejkalojë kufijtë e lejueshëm në një fushatë elektorale”, u shpreh ai.

Ndërkaq, përfaqësuesit e partive politike, liderët e të cilave dy ditë më parë kanë nënshkruar edhe Kodin e Mirësjelljes zotohen se nuk do t’i shërbejnë acarimit të fushatës zgjedhore.

Ushtruesi i detyrës së presidentit, Jakup Krasniqi para pak ditësh ka apeluar tek qytetarët që në zgjedhjet e 12 dhjetorit, të ndëshkojnë politikanët që aplikojnë gjuhë të ashpër politike.