Qeveria e Kosovës përgëzon qeverinë e re të Irakut

Qeveria e Republikës së Kosovës përgëzoi kryeministrin e Irakut Nuri al-Maliki, me rastin e formimit të qeverisë së re.
Në telegramin e urimit që Qeveria e Kosovës i ka dërguar shtetit irakian thuhet se Qeveria e re e Irakut pasqyron fitore të demokracisë në këtë vend të traditës dhe civilizimit të hershëm, por edhe të rajonit të Gjirit dhe botës në përgjithësi.

“Kjo tregon në mënyrë të çartë se procesi demokratik është themel i fuqishëm për paqe dhe stabilitet. Përbërja e qeverisë së re të Irakut reflekton diversitetin e pasur religjioz, etnik dhe kulturor të popullit të saj. Republika e Kosovës, çdoherë do të përkrahë dhe do të zhvillojë marrëdhënie miqësore me shtetet të cilat i përqafojnë vlerat e tilla”, thuhet në telegram.

Më tej në letrën e urimit drejtuar qeverisë së re të Irakut thuhet se “me krijimin e qeverisë së re të Irakut, ne shpresojmë në lidhjen e marrëdhënieve diplomatike bilaterale ndërmjet dy vendeve tona në muajt në vijim”.