Biden përgëzon Jahjagën

Presidentja e Republikës së Kosovës, Atifete Jahjaga, e cila po qëndron për vizitë zyrtare në Republikën e Italisë, me ftesë të Presidentit Giorgio Napolitano, të enjten mori pjesë në manifestimin qendror të festimit të 150 vjetorit të Bashkimit kombëtar italian. Në ceremoni të pranishëm ishin edhe personalitete të larta të vendeve të ndryshme të botës, ndër ta edhe nënkryetari amerikan, Joe Biden, me të cilin presidentja Jahjaga pati një takim të veçantë.

Nënkryetari amerikan e përgëzoi presidenten Jahjaga për zgjedhjen e saj në krye të vendit. Ai e quajti zgjedhjen e saj një moment shumë të rëndësishëm në angazhimin e vazhdueshëm të integrimit sa më të shpejtë të Kosovës në strukturat euroatlantike dhe përparimin e përgjithshëm të vendit.

“Nënkryetari amerikan Biden theksoi marrëdhëniet shumë të mira mes SHBA-ve dhe Republikës së Kosovës të cilat do të zhvillohen më tej, sepse SHBA e kanë përkrahur dhe do të vazhdojnë edhe më tej ta përkrahin Republikën e Kosovës në të gjitha drejtimet”, thuhet në një njoftim të Presidencës.

Nga ana e saj, presidentja Jahjaga falënderoi nënkryetarin Biden për përkrahjen e SHBA-ve për Republikën e Kosovës që siç tha ajo është vendimtare dhe vlerësohet shumë nga populli dhe institucionet e Republikës së Kosovës.

Gjatë vizitës në Itali Jahjaga është takuar edhe me Presidenten e Konfederatës së Zvicrës, Michelin Calmy-Rey, koprinci i Andorës, arqipeshkvi Joan Enric Vives i Sicilia, Presidentin e Kroacisë, Ivo Josipoviq, Presidentin e Maqedonisë, Gjorgji Ivanov, Presidentin e Sllovenisë, Danilo Turk, Presidentin e Afganistanit, Hamid Karzai, Presidentin e Hungarisë, Pal Shmit, e shefa të tjerë shtetesh, pjesëmarrës në manifestim. /Telegrafi/