Google hyn në modë me Boutiques.com

Gjiganti i kërkimit në internet, kompania Google, në mëngjesin e së mërkurës ka lansuar faqen e re për blerje të modës – faqen Boutiques.com.
Boutiques.com po synon të ndryshojë mënyrën se si njerëzit blejnë veshje apo aksesorë online, duke përdorur konceptin e njohur si “kërkimi vizual” si dhe duke u mundësuar njerëzve të krijojnë “butikun” e tyre personal, i cili do të shërbejë për t’i përshtatur kërkesat dhe shijet e blerësve, thuhet në njoftimin e Google.

Faqja e re e blerjeve fillimisht ishte krijuar nga anëtarët e Like.com, një kompani e kërkimit vizual të cilën Google e pati përvetësuar gjatë kësaj vere.

Kërkimi vizual është një metodë e kërkimit e cila përdor fotografitë për të përcaktuar se çka është duke kërkuar një përdorues, ndërsa kështu përdoruesi nuk përdor vetëm tekst, siç bën sot në Google.com.