Fidel Kastro s’është më shef i partisë kubaneze

Havana, 18 nëntor - Ish-lideri kubanez, Fidel Kastro, ka bër të ditur se për shkaqe shëndetësore është tërhequr nga funksioni i shefit të Partisë Komuniste të Kubës, kanë bërë të ditur agjencitë nga ky ishull.
Fidel Kastro u ka thënë të mërkurën studentëve se nuk ishte me ta në cilësinë e sekretarit të parë të paretisë në pushtet, citojnë mediat lajmin e agjencisë kubaneze të lajmeve, Prensa Latina.

“Jam i sëmurë dhe kam bërë atë që është dashur – kam transferuar funksionin tim. Nuk mund të bëj diçka që nuk jam në gjendje t’ia kushtoj gjithë kohën time”, është shprehur Kastro.

Kastro më 2006, kur ishte kryetar i Kubës, pas një ndërhyrjeje kirurgjike përkohësisht ia transferoi pushtetin të vëllait, Raulit (79 vjeç)
Zyrtarisht nga funksioni i kryetarit u tërhoq në shkurt të vitit 2008, kur e trashëgoi i vëllai Rauli.
Fideli ndërkaq formalisht vazhdoi të jetë në krye të Partisë Komuniste e cila është e vetmja parti politike legale në Kubë.
Fidel Kastro (84) ka qenë kryetar i Kubës 49 vjet, pasi e mori pushtetin me revolucion në vitin 1959.
Largimi i Fidelit nga kreu i partisë është më shumë i natyrës simbolike, meqë për shkak të sëmundjes katër vjet nuk është shfaqur në publik.

Sipas Rojtersit, largimi i Fidelit nga funksioni i fundit është edhe një shenjë se udhëheqja e moshuar kubaneze ndodhet para tranzicionit.