Qeveria ndau 1.5 milion euro për përmbytjet

Kosova do të dërgojë ndihma shtesë në Shqipëri, për t’i bërë ballë situatës së rëndë të krijuar në vend nga përmbytjet. Qeveria e Kosovës ka ndarë një milion euro ndihmë për zonat e përmbytura në Shkodër dhe 500 mijë euro për zonat e goditura nga reshjet e fundit në Kosovë.

Kryeministri në largim, Hashim Thaçi, tha se një milion euro ndahen për të ndihmuar Shqipërinë dhe ftoi kosovarët të solidarizohen me vëllezërit shqiptarë në ofrimin e ndihmës. Ai premtoi dërgimin e njësive të tjera të FSK-së për t’i ndihmuar banorët e zonave të përmbytura në Shkodër.

Gjatë të së martës, nga Kosova për në Shqipëri do të dërgohen 15 kamionë, dy autoambulanca të FSK-së dhe tre autoambulanca të tjera nga sektori shëndetësor.

Edhe javën e kaluar Qeveria e Kosovës ofroi ndihmë duke dërguar efektiva të FSK-së të cilët kanë ndihmuar në shpërndarjen e ndihmave në zonat e përmbytura.