Azemi, sportist i vitit i Prishtinës

Prishtinë, 27 dhjetor - Basketbollisti i Sigal Prishtinës, Edmond Azemi është shpallur sportisti më i mirë për vitin 2010 nga Komuna e Prishtinës, në ceremoninë e mbajtur të dielën mbrëma. Për Azemin kjo është hera e tretë që shpallet sportisti më i mirë i vitit i Prishtinës, kurse e dyta rresht.
Azemi u shpall më i miri me 64 pikë të mbledhura, duke lënë pas vetes hendbollisten e Prishtinës, Mimoza Xhemailin dhe futbollistin Behar Maliqi. Xhemaili u rendit e dyta me 51 pikë, kurse Maliqi i treti me 48 pikë.
"Është një nder i madh dhe privilegj të jem më i miri në Komunën e Prishtinës, pasi nuk është aspak lehtë. Por, besoj se këtë epitet e kam merituar, pasi kam punuar shumë", u shpreh Azemi, i cili në edicionin e shkuar me Sigal Prishtinën fitoi titullin e kampionit dhe Kupëne Republikës së Kosovës, kurse këtë edicion është kampion vjeshtor.
Në mesin e dhjetë sportistëve më të mirë të vitit sipas Komunës së Prishtinës, vend bën edh edhe Azem Ahmeti, Rrahman Ademaj, Herolind Nishevci, Rita Zeqiri, Xhemile Berisha, Suzana Reçica e Shqipe Kçiku.
Ramiz Krasniqi fitoi epitetin e trajnerit të vitit, kurse skuadra e hendbollit Prishtina në konkurrencën e femrave u shpall më e mira. Çmimi punëtori sportiv iu dha Fahri Buçincës (KH Prishtina), kurse Ylber Sylës (kikboks) ai i arbitrit më të mirë.
Komuna e Prishtinës me mirënjohje dalloi edhe pesë shpresat që gjatë këtij viti treguan rezultate të mira: Lorik Shabani, Dardan Syla, Amare Janjeva, Anyla Kryeziu e Alvin Karaqi.