Në mars, konstituimi i institucioneve të reja

Prishtinë, 9 janar – Koha Ditore shkruan sot se konstituimi i tërësishëm i institucioneve të reja pritet të mos ndodhë para gjysmës së parë të marsit.
Certifikimi i rezultateve të zgjedhjeve të 12 dhjetorit ka mbetur peng i rivotimit të pjesshëm në disa komuna, ku janë konstatuar parregullsi të mëdha. Rivotimi në Skenderaj, Drenas, Deçan, Malishevë e Lipjan bëhet këtë të diele (sot), ndërsa një vendim i Gjykatës Supreme urdhëron për përsëritje të zgjedhjeve në 24 vendvotime në Mitrovicë. Data e rivotimit në këto vendvotime ende nuk është caktuar, dhe pa u përmbyllur procesi edhe në këtë komunë nuk do të mund të certifikohen rezultatet, akt ky që i paraprin konstituimit të institucioneve.
Valdete Daka, kryetare e KQZ-së, ka përmendur të shtunën muajin shkurt kur pritet të ndodhë certifikimi. Megjithëkëtë, ajo nuk ka mundur të precizojë se në cilën pjesë të këtij muaji mund të ndodhë kjo.
“Nuk mund të jap ndonjë datë apo ndonjë muaj, mirëpo nëse marrim parasysh se tash do të kemi rivotim edhe në Mitrovicë, me siguri që muaji shkurt do të jetë ai në të cilin do të bëhet certifikimi i rezultateve”, ka thënë Daka.