Të gjitha qendrat e votimit të hapura me kohë

Rivotimi në pesë komunat është duke rrjedhë normalisht. Të gjitha qendrat e votimit janë hapur në orën 7:00 të mëngjesit dhe nuk janë shënuar parregullsi. Në terren po qëndrojnë vëzhgues të shumtë të akredituar nga Komisioni Qendror i Zgjedhjeve (KQZ).

Edhe vëzhgues ndërkombëtar janë duke e vëzhguar ripërsëritjen e zgjedhjeve të jashtëzakonshme parlamentare që ishin anuluar nga votimi më 12 dhjetor.

Ndërkohë 100 ekipe të vëzhguesve nga BE-j do të përcjellin çdo fazë të procesit të rivotimit të së dielës. Këtë herë ekipet do të jenë statike, që do të thotë ato do të qëndrojnë në një qendër votimi gjatë gjithë ditës.

Ekipet e vëzhgimit do të përbëhen nga anëtarë të stafit të Zyrës Civile Ndërkombëtare (ICO), anëtarë të misioneve diplomatike në Kosovë si dhe nga diplomatë të vendeve të tjera anëtare të BE-së dhe të rajonit të Ballkanit Perëndimor.

Edhe koalicioni i organizatave joqeveritare Demokracia në Veprim do të monitorojë procesin e rivotimit me mbi 500 vëzhgues.

Në këto votime të ripërsëritura, 138 mijë votues në komunat e Skenderajt, Drenasit dhe Deçanit, ndërsa votohet edhe në një vendvotim në Malishevë dhe Lipjan, do të japin votat e tyre në zgjedhjet e jashtëzakonshme parlamentare.