Mustafa: Dyert e LDK-së janë të hapura

Kryetari i LDK-së, Isa Mustafa

Kryetari i porsazgjedhur i Lidhjes Demokratike të Kosovës, Isa Mustafa, i ka thënë BBC-së se të gjitha subjektet politike në vend, së bashku me LDK-në, duhet të sigurojnë që zgjedhjet e 12 dhjetorit të jenë legjitime dhe që edhe rezultati i tyre të jetë legjitim. Në të kundërtën, tha ai, do të dështojë shtetndërtimi i Kosovës në këtë fazë.
Zoti Mustafa ka shfaqur synimin e partisë së tij që të fitojë në zgjedhjet e jashtëzakonshme dhe që të qeverisë me vendin në periudhën e ardhshme.

Ai tha se LDK-ja do të orientohet që të bëjë koalicione paszgjedhore me ato subjekte dhe parti politike me të cilat 'ka afërsi programore'.

“Mendoj se duhet të llogarisim edhe në ato. Ne objektivisht do të orientohemi në koalicion me ato subjekte dhe parti me të cilat kemi afërsi sa i përket programit ose kemi besim të plotë në sjelljet tona dhe përgjegjësinë për realizimin e qeverisjes dhe nuk e përjashtoj këtë. Por, tani për tani është herët të thuhet, sepse duhet të konsultohemi edhe me Kryesinë dhe Këshillin Qendror në këto dy ditë në mënyrë që të kemi orientimet e qarta për këtë,” ka deklaruar Mustafa për BBC.

Kryetari i komunës së Prishtinës fitoi të dielën zgjedhjet për kryetar të partisë në Kuvendin e shtatë të LDK-së, me një shumicë votash ndaj rivalit të tij, kryetarit të deritashëm Fatmir Sejdiu.

Në bisedën për BBC-në zoti Mustafa tha se LDK-ja do të jetë një forcë integruese në të ardhmen dhe do të jetë bashkëpunuese dhe e hapur për të gjithë, përfshirë edhe ata që e kanë lëshuar atë.