Dyert e BE-së mbeten ende të mbyllura për Serbinë

Arrestimi i shumë të kërkuarit për krime lufte, Ratko Mladic,
ishte domosdoshmëri. Mirëpo Serbia nuk guxon të jetë e kënaqur nëse
arrin të merr statusin e kandidatit për anëtarësim në Bashkimin
Evropian. Krijimi i raporteve të mira me të gjitha shtetet fqinje, në
veçanti me shtetin e Kosovës, është jashtëzakonisht e rëndësishme për
Serbinë për të shkuar tutje. Kështu ka deklaruar raportuesja për Kosovën
në Parlamentin Evropian, Ulrike Lunacek.Eurodeputetja
Lunacek, në një intervistë për të përditshmen e Vojvodinës, Dnevnik, ka
shkuar tutje duke porositur shtetet që ende mendojnë se nuk është
zgjidhur statusi i Kosovës, të mos mashtrohen se mund të vije deri të
ndarja e Republikës së Kosovës.
“Shumica dërmuese e përfaqësuesve në Parlamentin Evropian vlerëson se
as statusi i Kosovës dhe as ndarja e saj, nuk mund të jenë tema në
bisedimet që po zhvillohen në mes të Beogradit dhe Prishtinës. Madje
askush në bashkimin Evropian nuk do të përkrahte një Qipro të dytë, pra
ndarjen e shtetit në kufij që nuk janë të pranueshëm”, ka deklaruar
Lunacek.
Me arrestimin e Mladicit, Serbia nuk e meriton hyrjen në Bashkimin
Evropian, ka deklaruar diplomati gjerman, Wolfgang Ischinger. Ai ka
thënë për Deutsche Welle se do të ishte gabim i madh të mendohet se tani
Serbia e meriton t’i hapen dyert e Bashkimit Evropian.
“Ekziston edhe një pengesë e madhe që duhet të kapërcehet. Ajo është
refuzimi I Serbisë për t’u marrë seriozisht në kapërcimin e problemeve
me Kosovën. Sepse, për mua është e paimagjinueshme që Serbia të bartë në
Bashkimin Evropian problemin me Kosovën”, ka deklaruar ndër të tjera
diplomati gjerman. /Telegrafi/