Në web faqen Sejdiu ende president

Survejimi në web faqen zyrtare të presidentit të Kosovës është lehtësisht i manipulueshëm. Nuk ka shumë rubrika dhe informacione, ndërsa edhe në ato pak që janë ka një sërë gabimesh. Në ballinën e web faqes www.president-ksgov.net shfaqet fotografia e pesidentes së re, Atifete Jahjaga.
Madje, në njërën prej rubrikave në pjesën e majtë është e vendosur edhe biografia e saj. Megjithatë stafi i presidentes dhe zyra për marrëdhënie me publikun, nuk është kujdesur ta plotësoj me informacione të sakta web faqen, raportoi Indeksonline.

Në pjesën e djathtë, për një shtetas të huaj apo gazetar që dëshiron të marrë informatat bazë për shtetin e Kosovës, shpejt do të has në informatat e gabuara. Aty thuhet se Kosova është shtet i pavarur dhe sovran, që shpalli pavarësinë më 17 shkurt 2008, por e huq me presidentin aktual.

“Udhëheqësi i shtetit është Presidenti i Republikës. Ai përfaqëson unitetin e shtetit, udhëheq politikën e jashtme dhe është komandant i Forcës së Sigurisë së Kosovës. President i Republikës së Kosovës është dr.Fatmir Sejdiu, i zgjedhur në këtë post më 10 shkurt 2006, duke e pasuar Presidentin historik, dr.Ibrahim Rugova”, shkruan në seksionin KOSOVA.

Kurse më tej po ashtu përmendet se “zgjedhjet e fundit të përgjithshme janë mbajtur më 17 nëntor 2007, ndërsa zgjedhjet e fundit lokale më 15 nëntor 2009”. /Telegrafi/