Nëse i besoni intuitës mund të merrni vendim të gabuar

Londër, 11 janar - Nëse e dëgjoni shqisën tuaj të gjashtë dhe merrni vendime në bazë të instinkteve, me siguri do të bëni gabim të madh, pohojnë shkencëtarët.
Një studim i kohës së fundit, të cilin e kanë kryer shkencëtarët nga Universiteti Cambridge ka treguar që aktivitetet fizike në trupin tonë përcaktojnë sa shumë do të mbështetemi në intuitë dhe të marrim vendimin duke e ndjekur atë “ndjenjë të pazakonshme”.
Megjithatë, këshilla e shkencëtarëve është që njerëzit të mos mbështeten shumë në ndjenjat e tyre dhe të mos ndjekin instinktet.
Shkencëtarët po ashtu pohojnë që aftësia e parandjenjës për ndonjë vendim ndryshon nga personi në person.
“Shpesh themi që intuita vjen prej trupit – ndjekim instinktet tona të mira dhe i besojmë zemrës. Megjithatë, nuk jemi të sigurt nëse duhet ta ndjekim apo duhet të jemi dyshues ndaj asaj që na flet trupi”, ka thënë udhëheqësi i studimit, Barnaby Dunn, nga Universiteti Cambridge.
Dunn dhe shkencëtarët e tjerë kanë gjetur lidhje në mes ndjenjave të mira dhe vendimmarrjes intuitive, e cila është shumë më e fuqishme te njerëzit të cilët i besojnë zemrës së tyre.
“Ajo që ndodh në trupin tonë me të vërtetë ndikon në mendimet tona. Njerëzit duhet të jenë më të kujdesshëm kur vendosin të ndjekin instinktet e veta. Natyrisht, ato ndjenja nganjëherë ndihmojnë, ndërsa nganjëherë pengojnë marrjen e vendimit”, ka theksuar Dunn.