West Hami refuzon ofertën e Fiorentinës për Behramin

Londër, 11 janar - Krerët e West Ham Unitedit kanë refuzuar ofertën e parë të skuadrës italiane Fiorentina për transferimin e mesfushorit kosovar Valon Behrami, shkruan të hënën "Sky Sports". Behrami 25-vjeçar gjatë javës së shkuar është takuar me drejtuesit e Fiorentinës dhe pati arritur marrëveshje. Mirëpo, finalizimin e transferimit të tij e prishi skuadra angleze, e cila refuzoi ofertën e Fiorentinës.
"Behrami ishte pranë finalizimit të transferimit te Fiorentina, por tash për tash klubi italian dhe ai anglez nuk janë afër për të arritur marrëveshje", thuhet në sajtin anglez. "Fiorentina ka pritur të zyrtarizojë Behramin në fund të kësaj jave, por West Hami insiston se kërkesat e tyre për Behramin nuk janë përmbushur".
Megjithatë, bëhet e ditur se pazari nuk është mbyllur ende dhe krerët e West Hamit presin që gjatë këtyre ditëve skuadra e Fiorentinës të bëjë ofertë më bindëse nëse dëshiron të ketë Behramin në radhët e veta gjatë këtij dimri.
Ndërkohë, mediumet italiane bëjnë të ditur se oferta e Fiorentinës për Behramin është bllokuar, pasi së fundi interesimin për shërbimet e tij e ka shtuar edhe Juventusi. Pos Juventusit, transferimin e mesfushorit gjatë këtij dimri me çdo kusht e kërkojnë edhe dy skuadrat tjera italiane, Sampdoria e Genoa.
Behrami ka kontratë me skuadrën londineze deri në qershorin e vitit 2013, kurse në radhët e skuadrës londineze kaloi nga Lazio në vitin 2008. Ai këtë edicion ka pasur telashe të shumta me lëndimet, por megjithë këtë, ka shënuar dy gola për West Hamin në ato pak ndeshje që luajti.
Kosovari në tri ndeshjet e fundit, përfshirë edhe atë të FA Cup, nuk është përfshirë fare në formacionin e skuadrës nga Londra, pasi tashmë është vënë në shitje.