Shqipëria s'i lejohet, Zvicrën s'e do, pret Kosovën

Prishtinë, 11 janar - Mesfushori kosovar Migjen Basha ka humbur gati të gjitha shpresat se një ditë do ta veshë fanellën e Kombëtares shqiptare, pasi Federata e Futbollit e Zvicrës nuk dëshiron t’ia japë dritën jeshile. Zvicra mban të drejtën ta pengojë, pasi Basha ka luajtur tri ndeshje me grupmoshën U-21 të "helvetikëve" dhe arsyetimi i zviceranëve tani është se llogarisin në mesfushorin e Atalantas për Ekipin A. Megjithatë, Basha ngul këmbë se do të refuzojë Zvicrën dhe nëse nuk i lejohet të luajë për Shqipërinë, atëherë do ta presë Kosovën, për ku thotë se nuk mund ta ndalojë askush, pasi është origjina e tij, shkruan “Koha Ditore”.
Basha ka marrë pasaportën shqiptare, por kjo nuk i mjafton, i duhet edhe leja e Federatës së Zvicrës. Edhe drejtuesit e FSHF-së ditë më parë kanë deklaruar se e shohin punë të vështirë për ta marrë Bashën në Kombëtare.
"Ka gati tre muaj që nuk kam marrë asnjë përgjigje nga zyrtarët e FSHF-së dhe kjo më bën mua që t'i çoj duart nga Kombëtarja. Si duket ëndrra ime merr fund dhe zor se zviceranët do të më lëshojnë, pasi më llogarisin si pjesë e tyre. Unë kam gati një përgjigje negative për Zvicrën, nuk do të pranoj asnjë ftesë nga kjo përfaqësuese. Unë jam shqiptar dhe dëshira ime është të luaj për Kombëtaren e Shqipërisë, e nëse kjo nuk bëhet, atëherë do të pres Përfaqësuesen e Kosovës", ka thënë Basha të hënën për gazetën.
Në kohën kur Basha u paraqit me grupmoshat e reja të Zvicrës ai nuk e kishte shtetësinë shqiptare dhe rregullat e FIFA-s nuk e lejojnë të ndërrojë përfaqësuese, ndonëse nuk ka luajtur asnjë ndeshje me ekipin A. Kjo, pasi Shqipëria nuk është vendi i origjinës së lojtarit. Ndryshe do të ishte rasti me Kosovën.
"Operacioni për të marrë Bashën po vështirësohet gjithnjë e më shumë. Zviceranët nuk duan ta japin pasi e shikojnë si lojtar të vlefshëm për ekipin e tyre. Ne nuk mund ta marrim pa lejen e tyre, pasi ai ka luajtur tri ndeshje me Shpresat e Zvicrës. Për këtë arsye ardhjen e tij në Kombëtare e shoh si shumë të vështirë", ka thënë zyrtari i FSHF-së, Besnik Çela, ditë më parë.
Mesfushori që luan në Serie B me Atalantan ka folur edhe për ofertat që kanë ardhur në adresë të tij. Ai konfirmon interesimin e disa skuadrave të Serie A, si Chievo e Cagliari. E do edhe Torino që luan në Serie B. Mirëpo edhe një lëvizje në nivel klubesh tash për tash është e vështirë për të. Ai thotë se Atalanta nuk është e interesuar të heqë dorë nga ai.
"Menaxheri im ka biseduar me drejtuesit e Atalantas dhe ata i kanë kthyer përgjigje negative për një kalim të mundshëm te skuadrat e interesuara, pasi më shohin si të ardhme të klubit. Nuk besoj se do të largohem në afatin kalimtar të dimrit. Unë kam kërkuar nga shtabi teknik i skuadrës që këtë vit të kem më shumë hapësirë dhe të luaj sa më shumë ndeshje në përbërjen e parë", ka shtuar 24-vjeçari.
Basha ka nisur karrierën si 10-vjeçar në klubin shqiptar të Zvicrës, Dardania, për të kaluar në vitin 2004 te Lausanne, ku qëndroi një vit. Më pas kaloi te Lucchese, ku qëndroi deri më 2007.
Një gjysmë sezoni kaloi edhe në Viareggio, pastaj luajti edhe për Riminin dhe Frosinonen, derisa nuk u transferua tek Atalanta më 2010 për 2.2 milionë euro dëmshpërblim.
Për grupmoshat e Zvicrës (U-15 dhe U-21) ka luajtur 15 ndeshje dhe ka shënuar një gol me ekipin U-21.