Gjykata kufizon imunitetin e Berlusconit

Romë, 13 janar - Gjykata Kushtetuese Italiane ka kufizuar në mënyrë të pjesshme ligjin që i jep imunitet kryeministrit Silvio Berlusconi gjatë kohës sa është në detyrë. Sipas këtij vendimi të Kushtetueses, gjykatësit do të jenë ata të cilët do të vendosin nëse kryeministri italian duhet të përballet me gjyqin për korrupsion.
Kjo konsiderohet një disfatë për kryeministrin aktual italian, i cili është aktualisht i paditur në dy gjykata, por ato janë pezulluar për shkak të ligjit që mbron imunitetin e tij.
Vetë Berlusconi ka mohuar të ketë kryer akte korruptive, ndërsa pati thënë se do ta shpërfillë vendimin e gjykatës dhe se qeveria nuk do të ndikohej nga asnjë vendim.
Berlusconi akuzohet se i ka dhënë ryshfet avokatit britanik, David Mills, për dëshmi të rreme në vitin 1997, me qëllim të mbrojtjes së interesave të bizneseve të tij Ai akuzohet gjithashtu për evazion fiskal në blerjen e të drejtave televizive të perandorisë së tij mediatike Mediaset.