Së shpejti funksionalizohet Gjykata e Qarkut në veri

Së shpejti do të funksionalizohet Gjykata e Qarkut në veri të Mitrovicës, thotë zëdhënësja e EULEX-it, Karin Limdal. EULEX-i ka caktuar një afat për kthimin e gjyqtarëve dhe prokurorëve në veri, por, Limdal nuk saktëson kohën se kur pritet të ndodhë kjo.
Çështja e funksionalizimit të Gjykatës së Qarkut në pjesën veriore të Mitrovicës vazhdon të sfidojë edhe më tutje misionin e EULEX-it dhe institucionet e Kosovës. Zëdhënësja Karin Limdal thotë se EULEX-i është duke kërkuar në vazhdimësi nga Prishtina dhe Beogradi që të jenë më pragmatikë.

Ajo thotë se të dyja palëve iu është kërkuar të lejojnë gjyqtarët dhe prokurorët të kthehen në atë gjykatë, në mënyrë që lëndët të fillojnë të shqyrtohen nga një panel shumetnikë.
Por, zëdhënësja Limdal nuk saktëson kohën se kur mund të bëhet kthimi i gjyqtarëve dhe prokurorëve në Veri.

“Ju e dini që ne nuk dëshirojmë që të flasim për data të caktuara, por definitivisht ne kemi caktuar një afat, një lloj kërkesë, për të dyja palët që janë të përfshira në këtë çështje dhe presim që shumë shpejt të kemi një zgjidhje në këtë çështje. Por, siç thash, nuk preferoj të them kur, por në një të ardhme të afërt”, ka thënë Lidmal. /rtk/