Gjykata Supreme “shpëton” gjashtë komunarët

Gjykata Supreme e Kosovës i ka anuluar aktvendimet e Gjykatës së Qarkut në Prishtinë, për çështjen e paraburgosjes së gjashtë zyrtarëve të Komunës së Prishtinës. Këtë vendim gjykata e ka marrë pas kërkesës për mbrojtjen e ligjshmërisë që avokatët e të pandehurve Ridvan Shahini, Hazir Krasniqi, Ekrem Rexha dhe Halil Fejziu ia kanë drejtuar Gjykatës Supreme.
Me aprovimin e kësaj kërkese për mbrojtjen e ligjshmërisë të mbrojtësve të të pandehurve, Gjykata Supreme e Kosovës ka anuluar vendimin e shkallës së parë për caktimin e masës së paraburgimit prej 30 ditësh ndaj gjashtë zyrtarëve të Komunës së Prishtinës.
Gazeta Zëri ka siguruar aktgjykimin e Gjykatës Supreme, ku në arsyetimin e këtij aktgjykimi thuhet se gjykata gjeti që kërkesat për mbrojtje të ligjshmërisë janë të bazuara.

Në vendimin e Gjykatës Supreme thuhet se gjykata gjeti se për caktimin apo vazhdimin e paraburgimit nuk është e mjaftueshme që të theksohet vetëm mundësia abstrakte e ndikimit në dëshmitarë e cila, siç precizohet, ekziston në të gjitha rastet....

“Andaj, me bazë pretendohet në të gjitha kërkesat për mbrojtjen e ligjshmërisë se që të dy aktvendimet janë të përfshira me shkelje esenciale të dispozitave të procedurës penale që i bën juridikisht të paqëndrueshme”, thuhet në vendimin e Gjykatës Supreme të Kosovës.

Gjashtë zyrtarët e paraburgosur të Komunës së Prishtinës u arrestuan në fillim të këtij muaji, nën dyshimin se kanë keqpërdorur 846 mijë euro në tenderin për ndërtimin e kolektorit atmosferik mbi lumin Prishtevasja në lagjen “Kalabria” në Prishtinë. /Telegrafi/