EULEX nuk merret me komunarët e dyshuar, lirohen javën e ardhshme

EULEX-i nuk do që të merret me zyrtarët e Komunës së Prishtinës.
Kryetarja
e Asamblesë së Gjyqtarëve të EULEX-it, Maria Giuliana Civinini, ka
hedhur poshtë kërkesën për të marrë përsipër rastin e gjashtë zyrtarëve
të Komunës së Prishtinës të arrestuar para dy javësh nën dyshimin për
shpërdorim të detyrës zyrtare dhe autorizimeve, por ka premtuar se do ta
monitorojë.
“Kryetarja e Asamblesë së Gjyqtarëve të EULEX-it ka
hedhur poshtë kërkesën për të marrë përsipër rastin nga një gjykatës
vendor te një gjykatës i EULEX-it. Megjithatë, gjykatësit e EULEX-it nga
Gjykata e Qarkut në Prishtinë do të monitorojnë nga afër këtë rast”, ka
konfirmuar zëdhënësi i EULEX-it, Blerim Krasniqi.
Me kërkesë të
mbrojtjes të mërkurën është mbajtur një seancë në të cilën janë
paraqitur argumentet dhe kërkesa e mbrojtjes që EULEX-i ta marrë rastin.
Por asnjë prej arsyeve të parashtruara nga avokatët mbrojtës për
politizim të rastit, mungesë të profesionalizmit të prokurores dhe
gjyqtarit, etj. nuk e kanë bindur Civininin që ta marrë rastin përsipër.

Ndërkohë, javën e ardhshme, Gjykata Supreme pritet ta shqyrtojë
ankesën e mbrojtjes kundër vendimit të gjyqtarit të procedurës paraprake
të Gjykatës së Qarkut në Prishtinë dhe një kolegji të kësaj gjykate.
Por para se të ndodhë kjo, prokurorja e rastit, Drita Hajdari, do t’i
lirojë nga paraburgimi gjashtë zyrtarët komunalë.
Burime brenda
Prokurorisë kanë thënë se prokurorja Hajdari do t’i marrë në pyetje të
dyshuarit dhe dëshmitarët, çka do ta bëjë të pavlefshme argumentin se të
dyshuarit mund të ndikojnë në dëshmitarë.
Avokati Tomë Gashi thotë
se një ndër arsyet pse nuk është marrë rasti nga EULEX-i është pikërisht
se javën e ardhshme do të vendosë Gjykata Supreme lidhur me ankesën.
Por problemi, sipas tij, është se prokurorja e rastit ende nuk ka
vendosur për marrjen në pyetje, sepse i vetmi arsyetim është se mund të
ndikojnë në dëshmitarë.
Gjerësisht lexoni sot në gazetën “Koha Ditore”