Gjykata shpall vendimin më 10 nëntor

Nexhat Daci

Lideri i LDD-së, Nexhat Daci, mund të dënohet nëse trupi gjykues i Gjykatës së Qarkut në Prishtinë, i përbërë nga dy gjyqtarë të EULEX-it dhe një vendor, merr parasysh kërkesën e prokurores, Fikrie Krasniqi, e cila në fjalën përfundimtare, të enjten, kërkoi dënimin e tij dhe të ish-këshilltarit të tij, Ahmet Alishani.
Daci akuzohet se në pozitën e kryetarit të Kuvendit të Kosovës, ka keqpërdor rreth 36 mijë euro nga buxheti i këtij institucioni, për nevoja private.

Mbrojtja dhe i akuzuari Daci thanë se nuk ka prova që trupi gjykues ta shpallë fajtor akademikun, njofton Koha. Në fjalën përfundimtare, lideri i LDD-së tha se kjo akuzë i është veshur atij me qëllim, nga njerëzit që e kanë sjellë Kosovën në situatën në të cilën tash gjendet.

Megjithëse ai nuk përmendi askënd me emër, u nënkuptua se këto akuza i drejtohen ish-presidentit Sejdiu dhe kryeministrit në largim Thaçi. Gjykimin kundër tij, Daci e quajti telenovelë të UNMIK-ut. “Kjo ka qenë një telenovelë politike nga UNMIK-u, të kërkuar fuqishëm prej njerëzve pa traditë politike dhe pa ndjenjë kombëtare”, tha Daci.

Ish-kryetari i Kuvendit akuzohet se ka përvetësuar dy gjeneratorë në vlerë prej 36 mijë eurosh të cilët i ka instaluar në shtëpinë e tij në Prishtinë dhe vilën në Brezovicë. Ndërsa ish-këshilltari i tij, Ahmet Alishani, ngarkohet se ka dhënë urdhër që gjeneratorët të dërgohen në shtëpitë e Dacit. Vendimi i gjykatës do të jepet më 10 nëntor.