Sqarimi i Gjykatës Kushtetuese bie ndesh me vendimin

Shefi i Grupit Parlamentar të Koalicionit Kosova e Re, Ibrahim Makolli, duke komentuar sqarimin e Gjykatës Kushtetueses mbi vendimin në rastin Pacolli, ka thënë se sqarimi i fundit i Gjykatës Kushtetuese bie ndesh me vendimin e saj.
Në një intervistë për Radion Evropa e Lirë, Makolli ka thënë se koalicioni PDK-AKR sërish do të rikandidojë Behxhet Pacollin për president. Ai hedh poshtë mundësinë e tërheqjes së Pacollit, pas thirrjes së opozitës për një president konsensual.

“Tashmë është problem që besoj as vetë Gjykata Kushtetuese nuk do të dijë të interpretojë se çfarë ka vepruar në aktgjykim dhe çfarë ka dhënë me sqarimet, sepse ka elemente ku bie në kundërshtim vetë sqarimi me vendimin. Si duket përpjekjet për të përmirësuar diçka në këtë drejtim, e kanë detyruar që të bëjë një sqarim, i cili mund të ngjajë në gjithçka, po më së paku në një sqarim të thjeshtë. Nuk është dhënë përgjigje e merituar në ato çështje që janë kryesoret. Tash, siç po dihet, çështja kthehet në pikën zero”, ka thënë Makolli.

I pyetur se kur mund të thirret seanca e ardhshme e Kuvendit, Makolli ka thënë se kjo do të ndodhë shumë shpejt.

“Besoj brenda pak ditësh... Javën tjetër pritet që Kosova ta ketë presidentin e vet të zgjedhur”, ka thënë Makolli. /Telegrafi/