BE-ja të veprojë rreth akuzave ndaj Thaçit

Qendra për Studime të Politikave Evropiane (CEPS) vlerëson se Bashkimi Evropian duhet të kërkojë nga kryeministri i Kosovës, Hashim Thaçi, që të japë dorëheqje, derisa prokurorët ndërkombëtarë të hetojnë akuzat për “përfshirje e tij në krimin e organizuar dhe në trafikun e organeve”.

Kërkesa e kësaj qendre për Brukselin zyrtar vjen duke u bazuar në raportin e raportuesit të Këshillit të Evropës, Dick Marty, i cili e akuzon kryeministrin Thaçi dhe ish Ushtrinë Çlirimtare të Kosovës për trafikim organesh të serbëve të zënë rob gjatë luftës në Kosovë.

Bashkimi Evropian duhet të përmbushë “rolin që i ka caktuar vetes si forcë udhëheqëse për transformimin politik dhe integrimin ekonomik të Ballkanit Perëndimor në Evropën moderne dhe në vlerat e saj”, thuhet mes të tjerash në analizën e kësaj qendre, njofton REL.

Raporti i Martyt është vlerësuar si shpifës dhe racist nga autoritetet e Kosovës dhe të Shqipërisë, të cilat janë treguar të gatshme për hetimin e pretendimeve të senatorit zviceran, i cili në pjesën më të madhe të raportit i referohet “të dhënave” të përgatitura nga prokuroria serbe.