Udhëheqësia e AAK e viziton Ramush Haradinajn në Hagë

Burim Ramadani, Ardian Gjini, Besnik Tahiri dhe Avni Arifi po qëndrojnë në Hagë. Ata janë atje në një “vizitë private”, tek kreu i partisë, Ramush Haradinaj.

Vizita e lartë partiake e përnjëhershme vjen në kohën që janë intensifikuar llogaritë për koalicionin e ri qeveritar.

Siç transmeton Zëri, AAK-ja është ndarë në dy taborë sa i përket koalicionit të mundshëm me PDK-në e Hashim Thaçit.

Në njërën anë janë “humbësit” e zgjedhjeve të partisë, ata që nuk kanë arritur të hyjnë në parlament. Ky grup është në favor të koalicionit me PDK-në.

Në anën tjetër, pjesa më e “rëndësishme” dhe më me peshë e partisë ende refuzon idenë e krijimit të qeverisë bashkë me PDK-në.

Prandaj, fjalën përfundimtare do ta thotë Ramush Haradinaj. Mbase, vendimin e tij do t’ua përcjellë katërshes që po qëndron në vizitë tek ai.