Kuvendi debaton për Ramush Haradinajn

Në një mbledhje të jashtëzakonshme, të martën, Kuvendi do të debatojë për gjykimin në Tribunalin e Hagës të kreut të Aleancës për Ardhmërinë e Kosovës (AAK), Ramush Haradinaj.

Debati është iniciuar nga deputeti i AAK-së, Ahmet Isufi, ndërsa Kryesia e Kuvendit të hënën ka vendosur që të mbahet seanca e jashtëzakonshme, ku do të diskutohet për gjykimin e Haradinajt dhe bashkëluftëtarëve të tij, Lahi Brahimaj dhe Idriz Balaj.

Iniciativa ka ardhur edhe me mbështetjen edhe të nënshkrimeve të 40 deputetëve të partive të ndryshme, ka konfirmuar për Indeksonline, sekretari i përgjithshëm i AAK-së, Burim Ramadani.

Qëllimi i kësaj iniciative është që Kuvendi të kërkojë gjykim të shpejtë dhe fer, si dhe t’i jepet Haradinajt përkrahje institucionale.

Sipas paralajmërimeve, gjykimi kundër Haradinajt do të fillojë në qershor. /Telegrafi/