Flash Cookies tani nën kontroll

New York, 17 janar - Pas disa vitesh të pakëndshme, kur cookiet e Flashit për shumicën e shfrytëzuesve (të thjeshtë) ishin të paqasshme, ndërsa përdoreshin për përcjelljen e shprehive të shfrytëzuesve, arrijnë lajme freskuese nga Adobe. Në bashkëpunim me Microsoft dhe Google, Adobe ka implementuar API-n e ri për browserë, i cili do t’ua lehtësojë shfrytëzuesve që të largojnë objektet e ndara lokaliste (LSO – cookie të Flashit), të cilat i shfrytëzon Flash shtesa. API i ri (NPAPI ClearSiteData) tashmë është aprovuar dhe do të duhej të paraqitej në Firefox në një të ardhme të afërt. Në postimin e vet për punën në këtë API, Adobe ka bërë të ditur se si ridizajni i Flash Player Settings Managerit arrin së shpejti dhe se do të lehtësojë dukshëm përdorimin në të gjitha platformat. Ky ndryshim është shtesë e opsionit tashmë ekzistues të “surfimit privat” që ekziston në Internet Explorer, Chrome, Safari dhe Firefox, dhe i cili pamundëson ruajtjen e të dhënave gjatë sesionit të surfimit. Nuk u bë e ditur se a janë duke punuar Apple dhe Microsofti në aplikimin e ndryshimeve për përkrahje për API-n e ri.
Kjo risi arrin si njëfarë epilogu i padisë së kohëmëparshme kundër disa shtëpive mediale (MTV, Disney, Hulu, etj.) për shkak të krijimit të sërishëm të cookie-ve të fshira përmes LSO-së së Flashit. Kjo është realizuar ashtu që ID-ja unike e shfrytëzuesit është ruajtur në LSO, dhe më vonë është lexuar dhe shfrytëzuar për kthimin e cookies që ishin fshirë normalisht. Dhe kjo nuk ndalej në LSO-në e Flashit, por kohë më parë një nga programet publikoi një JavaScript API për ruajtjen e informatave për shfrytëzuesit në 13 vende të ndryshme, për të tërhequr kështu vërejtjen për problemin e përcjelljes dhe mbledhjes së të dhënave.