Shënohet dyvjetori i themelimit të FSK-së

Forca e Sigurisë së Kosovës shënoi të premten dyvjetorin e themelimit, ndërsa po ashtu u bë e ditur se nga sot do të fillojë edhe kampanja e rekrutimit për kadetët e rinj.

Në ceremoninë e organizuar me rastin e dyvjetorit të themelimit të FSK-së para përfaqësuesve të lartë vendorë e ndërkombëtar, u prezantuan edhe armët e reja, të cilat do t’i ketë FSK-ja.

Kryeministri në largim i Kosovës Hashim Thaçi e çmoi punën e FSK-së, ndërsa shprehu gatishmëri për të ndihmuar edhe më shumë në ngritjen e kapaciteteve.

U tha se për dy vjet, është arritur mjaft shumë, ndërsa u theksuan si shumë të rëndësishme aksionet e kësaj force në kërkim shpëtimin e shqiptarëve në Shkodër.

Ndërkaq, meritat e FSK-së para ushtarakëve, diplomatëve dhe qytetarëve, i prezantuan ministri i FSK-së Fehmi Mujota dhe komandanti Gjeneral Sylejman Selimi.

Edhe zëvendëskomandanti i KFOR-it, Marko Serronja falënderoi krerët e FSK-së për bashkëpunimin dhe ngritjen e tyre në mënyrë profesionale.

Gjatë ditës së sotme, të gjitha kazermat e FSK-së do të jenë të hapura për vizitë, ku do të ketë edhe ciceronë për t’i informuar për punën e tyre.

Po ashtu, nga e premtja do të fillojë edhe kampanja e rekrutimit për kadetët të rinj. FSK aktualisht ka 2147 pjesëtar aktiv, ndërsa është në fazën e rekrutimit të pjesës rezervë.