Shënohet Dita Kombëtare e të Pagjeturve

Dita Kombëtare e të Pagjeturve në Kosovë të mërkurën shënohet me një varg aktivitetesh të përqendruara në Prishtinë. Shënimi i kësaj dite, më 27 prill, bëhet për faktin se në këtë datë, në vitin 1999, në fshatin Mejë të komunës së Gjakovës, forcat serbe kanë vrarë dhe zhdukur 377 civilë shqiptarë të moshës prej 15 deri 75 vjeç. Ata ishin banorë të zonës Reka e Keqe, të Junikut, Deçanit dhe Gjakovës.
Haki Kasumi, drejtues i Këshillit të Asociacioneve të Familjarëve të Personave të Pagjetur, ka thënë për Evropën e Lirë se ende mungon serioziteti i institucioneve për t’iu qasur drejt problemit..

“Edhe 12 vjet pas përfundimit të luftës, nga numri i përgjithshëm që ishte mbi pesë mijë të zhdukur, kanë mbetur edhe 1 800 njerëz, për të cilët mungon çdo informacion. Institucionet tona, në njëfarë mënyre, nuk janë serioze në qasjen e këtij problemi”, ka thënë Kasumi.

Prenk Gjetaj, drejtues i Komisionit Qeveritar për Personat e Pagjetur, ka thënë se angazhimi i institucioneve qeveritare për çështjen e zbardhjes së fatit të këtyre personave është i vazhdueshëm.

Të martën, Fondi për të Drejta Humanitare, si pjesë e koalicionit të organizatave joqeveritare për Komisionin Rajonal (KOMRA), ka nisur grumbullimin e nënshkrimeve në Kosovë, për themelimin e këtij komisioni. /Telegrafi