Rreth 40 ekipe përcjellin rivotimin në Mitrovicë

Zyra e Përfaqësuesit Special të Bashkimit Evropian (EUSR) në Kosovë sërish do të koordinojë “Vëzhgimin e Zgjedhjeve të Kosovës 2010” për të përcjellë rivotimin në zgjedhje në Komunën e Mitrovicës, të dielën më 23 janar 2011.

Misioni për Vëzhgim të Zgjedhjeve do të përbëhet prej rreth 40 ekipeve me pjesëtarë të ICO/EUSR, pjesëtarë të misioneve diplomatike në Kosovë, si dhe diplomatë nga vendet e tjera anëtare të BE-së dhe nga rajoni i Ballkanit Perëndimor, thuhet në një komunikatë për media.

Disa prej ekipeve të vëzhgimit do të vendosen në mënyrë statike, që do të thotë se gjatë tërë ditës do të qëndrojnë vetëm në një qendër votimi, ndërsa të tjerët do të jenë ekipe mobile që do të vizitojnë një numër vendvotimesh gjatë tërë ditës.

Këto ekipe do t’i përcjellin të gjitha fazat e procesit në ditën e zgjedhjeve. Përkitazi me vëzhgimet e tyre, ekipet e vëzhgimit do t’i raportojnë Qendrës Operative të Zgjedhjeve.

“Misioni për Vëzhgim të Zgjedhjeve nuk është zëvendësim për misionin monitorues. Zgjedhjet do të certifikohen nga Komisioni Qendror i Zgjedhjeve (KQZ) i Kosovës. Synimi i Misionit për Vëzhgim të Zgjedhjeve të Kosovës 2010 është që të inkurajojë zgjedhje që përmbushin standardet ndërkombëtare”, thuhet në fund të komunikatës.