Arbitri suspendohet me akuza për ngacmim seksual

Stockholm, 23 janar - Një skandal seksual ka prekur Botërorin 2011 të hendbollit, që po mbahet në Suedi, shkruajnë mediumet e huaja të shtunën. Një arbitër nga një vend i Afrikës së Veriut, pasi ka udhëhequr një ndeshje të fazës grupore, është arrestuar në dalje të palestrës. Ai është akuzuar për ngacmim seksual. Arbitri, emri i të cilit nuk është bërë i ditur, akuzohet se në hotelin "Elite Park Evenue" në Goeteborg ka ngacmuar seksualisht një shërbyese. Në këtë hotel janë vendosur të gjithë arbitrat e Botërorit 2011. Federata Ndërkombëtare e Hendbollit (IHF) ka reaguar menjëherë duke e suspenduar arbitrin.
Ngjarja ka ndodhur para ndeshjeve të xhiros së fundit të raundit të parë, mirëpo arbitri ishte lejuar të drejtonte një ndeshje. Ai më pas është arrestuar në dalje të palestrës. Është liruar pasi është marrë në pyetje.
"Ne e dimë se ai është marrë nga policia dhe hetimet po vazhdojnë. Nuk mund të komentojmë këtë rast, para se të hetohet i gjithë rasti", ka thënë zyrtari i IHF-së, Patrick Strube.
Botërori i hendbollit ka filluar më 13 janar dhe do të përfundojë më 30 janar. Ndeshjet e para të fazës së dytë të Botërorit 2011 janë zhvilluar të shtunën.