Punët e shtëpisë të rrezikshme për zemër

Londër, 27 janar - Kryerja e punëve të shtëpisë mund të ketë ndikim më të dëmshëm në shëndet dhe tension të gjakut sesa stresi në punë, ka treguar një hulumtim i kohëve të fundit nga Universiteti i Pittsburghut. Ky duket si justifikim i përsosur për t’u dembeluar pak.
Dukë lënë shakanë anash, punët e thjeshta të shtëpisë si pastrimi, gatimi, kujdesi për automobilin, buxhetin, mund të jenë të rrezikshme për zemër, sepse më shumë se obligimet në punë e ngrenë shtypjen e gjakut.
Megjithatë, stresi dhe tensioni nuk ndalen kur ikni nga puna. Përkundrazi, duket që obligimet që ju presin në shtëpi mund t’i bëjnë keq edhe më shumë shëndetit tuaj. Shkencëtarët kanë përcjellë 113 meshkuj dhe femra që kanë punë dhe familje me orar të plotë. Të gjithë ata kanë mbajtur shënime se sa orë në ditë kanë qëndruar në punë, çfarë përgjegjësish dhe obligimesh kanë pasur në shtëpi, dhe sa shumë janë marrë me këto gjëra e sa prej tyre i kanë kryer. Të gjithëve rregullisht u është matur tensioni i gjakut për tri javë me radhë. Po ashtu me anë të monitorit kanë përcjellë se si ka ndikuar puna në tensionin e tyre të gjakut, dhe si obligimet në shtëpi.
Rezultatet kanë treguar se si vetëm edhe të menduarit për punët e shtëpisë që duhet të kryhen është më stresues se vetë kryerja e tyre.
Por nuk janë të gjitha punët e shtëpisë njëlloj të vështira. Në krye të punëve “më stresuese” të cilat më së shumti e ngrenë tensionin e gjakut janë pastrimi, gatimi dhe shopingu. Pasojnë mbajtja dhe riparimet e automobilit, si dhe kujdesi për buxhetin e shtëpisë.
Është interesante se si kujdesi për fëmijë nuk ndikon dukshëm në tension të gjakut, sipas hulumtimit, edhe pse shumë prindër nuk do të pajtohen me këtë gjë.
Nëse disa hulumtime të mëhershme kanë treguar që disa punë të caktuara shtëpiake janë të mira për zemër, - rutina dhe mërzitja, si dhe mungesa e shpërblimit për punën e kryer kanë faj për efektet negative në shëndet. Disa hulumtime madje kanë treguar se si obligimet në shtëpi mund të çojnë edhe deri tek lindja e parakohshme.