Kontestohet zgjedhja e Llukës menaxher i AKP-së

Prishtinë, 28 janar – Agjencia Kosovare e Privatizimit për herë të parë, që nga themelimi i saj, është bërë me drejtor menaxhues. Bordi i Drejtorëve, në mbledhjen e së enjtes, ka emëruar Shkëlzen Llukën për drejtor menaxhues të AKP-së. Por zgjedhja e Llukës, sipas njërit nga anëtarët e Bordit, është bërë në kundërshtim me Ligjin e Agjencisë së Privatizimit. Kjo, meqë Lluka deri tani ka drejtuar Departamentin e Koordinimit Rajonal në AKP, ndërsa me Ligjin për AKP-në drejtor menaxhues duhet të jetë njëri nga anëtarët e bordit.
“Bordi emëron drejtorin menaxhues të Agjencisë nga radhët e veta”, thuhet në nenin 12 pika 3 të këtij ligji.
Bahri Shabani, anëtar i bordit, pas mbledhjes ka deklaruar se konkursi dhe zgjedhja e drejtorit menaxhues ka qenë tërësisht jotransparent dhe i paligjshëm.
“Ka qenë një veprim tërësisht antiligjor. Komplet procedurat e emërimit të drejtorit menaxhues kanë qenë jotransparente dhe antiligjore”, tha Shabani.
Ai në shenjë pakënaqësie ka lëshuar mbledhjen e bordit.
“Nëse dikush e mbron ligjin në këtë vend, atëherë duhet të reagojë. Nëse ligji nuk është i mirë, duhet ta ndërrojmë, por jo të punojmë në kundërshtim me të dhe ta shkelim atë vetëm se dikujt i pëlqen ashtu”, tha Shabani.
Në komunikatën e lëshuar nga Zyra për informim e AKP-së është thënë se procesi ka qenë transparent dhe i bazuar në Ligjin për Shërbim Civil.
“Pas përfundimit të suksesshëm të procedurës së hapur, konkurruese dhe transparente, të përcaktuar në bazë të Ligjit mbi Shërbimin Civil dhe Udhëzimit Administrativ të Ministrisë së Shërbimeve Publike mbi procedurat e rekrutimit, drejtorët e Bordit intervistuan kandidatët për drejtor menaxhues të agjencisë. Në bazë të principit meritor dhe me konsensus të gjerë, në mungesë të vetëm njërit nga drejtorët e Bordit, ky emëroi Shkelzen Llukën për drejtor menaxhues të AKP-së”, thuhet në njoftimin e zyrës për informim të AKP-së.