New Yorku Knicks, skuadra më e vlefshme në NBA

Washington, 28 janar - New York Knicks ka tejkaluar kampionen në fuqi të NBA-së, LA Lakers, duke u bërë skuadra më e vlefshme në këtë ligë, bazuar në renditjen e revistës amerikane "Forbes".
New Yorku zë pozitën e parë me 655 milionë dollarë vlerë, ndërsa Lakersat gjenden në pozitën e dytë me 643 milionë dollarë. New Yorku gjatë verës ka transferuar Amare Stoudemiren dhe fundorin Raymond Felton. Skuadra është duke luajtur me goxha sukses këtë edicion, është e gjashta në Konferencën Lindore me bilanc prej 23 fitoreve e 21 humbjeve dhe po lufton për një vend në plejof.
"Knicksat kanë shitur gjithë biletat sezonale për herë të parë që nga stinori 2001-02. Po ashtu kompania amë e Knicksave, 'Madison Quare Garden Inc.', ka firmosur marrëveshje sponsorizimi me 'JPMorgan Chase' në shtator që ka vlerë 30 milionë dollarë në vit", ka komentuar "Forbes".
Në të vërtetë vlera e New Yorkut këtë edicion është rritur për 12 për qind, për dallim nga edicioni i kaluar. Edhe Lakersat janë ngritur për 6 për qind për dallim nga stinori i kaluar.
Pozitën e tretë në listën e skuadrave më të vlefshme të NBA-së e zë Chicago Bulls. Bullsat "peshojnë" 511 milionë dollarë. Nënkampioni Boston Celtics gjendet në pozitën e katërt me 452 milionë dollarë, ndërsa Houston Rockets mban pozitën e pestë me 443 milionë dollarë. Vlera mesatare e 30 skuadrave të NBA-së është 369 milionë dollarë, një për qind më shumë se vitin e kaluar.
Dallimin më të madh në vlerë të skuadrave e ka bërë transferimi i LeBron Jamesit nga Clevelandi për në Miami. Asnjëherë në historinë 64-vjeçare të NBA-së një lëvizje e një basketbollisti nuk ka pasur ndryshim kaq të madh. Me Jamesin vlera e Miamit është rritur për 17 për qind dhe tash ka vlerën 425 milionë dollarë, ndërsa ajo e Clevelandit ka rënë për 26 për qind dhe tash vlerësohet 355 milionë dollarë.