BE prezanton masterplanin për Brezovicën

Zyra ndërlidhëse e KE-së të premten para hidesarëve lokal dhe ndërkombëtar ka prezantuar masterplanin për rikuperimin ekonomik të Brezovicës. Ky plan i jep theks rritjes inkluzive dhe pronësisë së fuqishme lokale si bazë për rikuperim të suksesshëm ekonomik të qendrës së skijimit.

Gurthemeli i masterplanit është që Brezovica të bëhet joshëse për investime dhe të njëjtën kohë të mbahet baraspesha ndërmjet objekteve ekzistuese dhe investimeve potenciale si dhe ruajtjes së mjedisit natyror. Aty propozohen aktivitete verore dhe dimërore si bazë për zhvillim ekonomik gjatë tërë vitit.

Shef i Zyrës ndërlidhëse të KE-së Renzo Daviddi, tha se brezovica me pak investime mund të hap mijëra vende pune. “Qendra e rikuperuar e skijimit në Brezovicë ka mundësi për krijimin e qindra vendesh pune për njerëzit nga të gjitha komunitetet. Ajo mund të shërbej si bazë për pajtim etnik dhe për zhvillimin e mjedisit në mënyrë të qëndrueshme”, theksoi Daviddi.

Ekspertët kanë analizuar një zonë të gjerë të Malit të Sharrit në rrethinën e Brezovicës dhe kanë arritur në përfundim që kjo qendër skijimi nuk i plotëson kërkesat e një kompleksi modern malor që funksionon gjatë tërë vitit.

Rekomandimi është që qendra e skijimit të zhvendoset në zonën e afërt në pjesën perëndimore të zonës ekzistuese. Zona e re do të ketë kapacitet për 10.000 mysafirë. Në periudhën afatshkurtër dhe afatmesëm parashihet zhvillimi në faza i pesë teleferikëve dhe i një fshati turistik për përmbushjen e kërkesës të më shumë se 6000 mysafirëve.

Zyra ndërlidhëse e KE-së po ashtu ka ofruar përkrahjen për të investuar në një pjesë të infrastrukturës që parashihet në implementimin e masterplanit.