Pagjumësia ndikon keq në shëndet dhe lidhje dashurie

Londër, 1 shkurt - Mungesa e gjumit duhet të trajtohet si problem shëndetësor, theksohet në raportin të cilin e ka publikuar Fondacioni për shëndetin mental.
Në raportin me emrin "Sleep Matters" tërhiqet lidhja në mes pagjumësisë dhe lidhjeve të këqija të dashurisë, mungesës së energjisë dhe pamundësisë për t’u koncentruar, përcjell BBC.
Mungesa e gjumit më herët është lidhur me depresionin, me sistemin e dobët të imunitetit dhe me sëmundjet e zemrës. Raporti u bën thirrje mjekëve për të fituar shkathtësitë shtesë që të mund t’i njohin simptomat.
Njerëzit të cilët vuajnë nga pagjumësia kanë deri në katër herë më shumë probleme në lidhje, kanë trefish më shumë gjasa të ndihen depresivë dhe rrezik trefish më të madh nga problemet me koncentrimin.
Hulumtuesi dr. Dan Robotham, autori kryesor i raportit, beson që njerëzit mund të jenë “të kapur” në spiralen, ku pagjumësia çon drejt problemeve me shëndetin mental. Çka manifestohet me forma edhe më të rënda të pagjumësisë.
“Është shumë e rëndësishme që njerëzit të jenë të vetëdijshëm për mënyrat efektive të ndërprerjes së kësaj spiraleje me përmirësimin e kualitetit të gjumit. Punëdhënësit, shkollat dhe institucionet shëndetësore duhen të mësohen ta njohin këtë problem dhe t’i ndihmojnë njerëzit që vuajnë nga pagjumësia”, ka thënë dr. Robotham.
“Më nuk mund të injorojmë ndikimin negativ të pagjumësisë. Problemet me gjumin ndikojnë negativisht në shëndetin, ekonominë, lumturinë dhe kënaqësinë tonë,” ka thënë prof. Colin Espije, drejtor i Qendrës Universitare për Gjumë në Glasgow.