Kosova e gatshme të bisedojë me Serbinë për të pagjeturit

Prishtinë, 2 shkurt - Të pagjeturit e luftës së fundit pritet të jenë një ndër temat më të nxehta në tavolinën ku do të diskutohet dialogu që pritet të nisë në mes të Kosovës dhe Serbisë, edhe pse një dialog i tillë tashmë 7 vjet po zhvillohet, por rezultatet kanë qenë minimale, thekson KTV-ja. Madje, Beogradi nuk i ka treguar rezultatet e atyre lokacioneve, të cilat janë dyshuar si varreza të mundshme masive, duke lënë në ankth shumë familje kosovare.
Komisioni qeveritar për të pagjeturit ka thënë se tashmë ia kanë deleguar qeverisë çështjet që duhet të diskutohen me Beogradin, sa i përket të pagjeturve. Çështja në të cilën do të insistohet do të jetë hapja e arkivit shtetëror, gjë e cila, sipas kreut të Komisionit qeveritar për të pagjeturit, Prenk Gjeta, do të ndikojë në zgjidhjen e këtij problemi. Por ai është kundër pjesëmarrjes së EULEX-it në këto bisedime. Ai thotë se Kosova nuk ka nevojë për ndihmën e askujt.
Në ndërkohë zyra e shefes së Politikës së Jashtme, Catherine Ashton, tashmë ka deleguar përfaqësuesin e saj, përkatësisht ndërmjetësin, i cili pranë tryezës së bisedimeve do të ulet në vendin e paraparë për BE-në. Sipas shtypit serb, bëhet fjalë për Robert Cooper-in, bashkëpunëtor i Catherine Ashtonit për çështje ballkanike, i cili njihet fare mirë në Prishtinë.
Dialogu Prishtinë-Beograd do të zhvillohet në Bruksel, ndërsa temat që do të hapen pritet të jenë trafiku ajror, telekomunikacioni, kadastra dhe çështja e të zhdukurve.