Mbajtja e zgjedhjeve serbe, cenim i sovranitetit

Grupi Parlamentar i Lidhjes Demokratike të Dardanisë ka kërkuar që në seancën e të enjtes të Kuvendit të Kosovës, si pikë e veçantë e rendit të ditës të futet cenimi i sovranitetit dhe integritetit të Kosovës, që sipas kësaj partie, është duke ndodhur në pjesën veriore të vendit.
Lulzim Zeneli tha se Kuvendi i Kosovës duhet të marrë një qëndrim ose rezolutë për hapat që duhet të merren në këtë situatë. Sipas LDD-së, mbajtja e zgjedhjeve lokale serbe në pjesën veriore të Kosovës dhe ardhja e delegacioneve të Serbisë pa leje të institucioneve të Kosovës është cenim i drejtpërdrejtë i sovranitetit dhe integritetit të Kosovës.

“Kuvendi i Kosovës duhet ta nxjerrë një përfundim. Përfundimi duhet të jetë qëndrim, rezolutë. Ajo që ka të bëjë me këtë është sjellja e pushtetit e qeverisjes konform realitetit. Realiteti është shumë i zymtë. Kushtetuta dhe ligjshmëria nuk respektohet dhe është koha e fundit që të parandalohet çdo veprim ilegal në Republikën e Kosovës”, tha nënkryetari i LDD-së, Lulzim Zeneli. /rtv21