Meditimi ndërron strukturën e trurit

Që moti është e njohur se me anë të meditimit mund të zvogëlohet stresi dhe të rritet ndjenja e qetësisë dhe e baraspeshës. Shkencëtarët nga universiteti amerikan Massachusetts kanë bërë edhe një hap para, duke pohuar se hulumtimi i tyre ka arritur të dëshmojë se me anë të meditimit ndërrohet edhe struktura e trurit. Duke krahasuar incizimet e trurit të fituara me rezonancë magnetike te pacientët që kanë marrë pjesë në programin tetë javor të meditimit dhe të pacientëve që nuk kanë medituar, kanë vërejtur ndryshime goxha të mëdha. Personat të cilët kishin medituar mesatarisht 27 minuta në ditë, kanë deklaruar se ndiejnë përmirësim të dukshëm në krahasim me ata që nuk kanë medituar, kurse shkencëtarë kanë arritur edhe ta masin këtë ndryshim.
Te personat që kanë medituar incizimet kanë treguar dendësi më të madhe në pjesët e turit që kanë lidhje me memorien, vetëbesimin dhe bashkëndjenjën, si dhe dendësi më të vogël në pjesën e trurit të lidhur me stresin. Ndërkaq, te personat që nuk kanë medituar ndryshime të tilla nuk janë vërejtur fare.
Sipas këtyre shkencëtarëve, kjo risi do të mund të lehtësonte shërimin e sëmundjeve dhe gjendjeve të ndryshme psikike, duke përfshirë edhe stresin posttraumatik.