Ministrat e ardhshëm të kenë integritet të lartë moral

Anëtarët e qeverisë së ardhshme, duhet të kenë integritetin më të lartë të mundshëm moral, ka thënë në premten shefi i Zyrës Civile Ndërkombëtare, Pieter Feith. Ai ka thënë se në fund të fundit, formimi i qeverisë së Kosovës është çështje që i takon lidershipit politik të Kosovës. “Nuk dua të përfshihem”, ka thënë ai.

I pyetur se a do të shqyrtohet mundësia e ndërhyrjes nëse thirrje “për qeveri me duar të pastra” nuk respektohet, Feith, në një intervistë për Radion Evropa e Lirë, është përgjigjur duke thënë se, “nuk do t’ju jap përgjigje përfundimtare mbi këtë çështje”. Sipas tij, aktualisht situata për Kosovën nuk është aspak e lehtë. Feith ka thënë se në gjashtë muajt e fundit Kosova ka pasur kthim prapa.

“Reputacioni ndërkombëtar i Kosovës ka pësuar goditje. Kosova vazhdon të jetë ende shumë e varur nga marrëdhëniet e afërta dhe konfidenciale me Brukselin dhe institucionet tjera donatore që ofrojnë mbështetje financiare dhe të tjera. Prandaj, është më se e rëndësishme që ne ta ndihmojmë Kosovën të rifitojë kredibilitetin dhe imazhin e saj ndërkombëtar, për të mundësuar tërheqjen e investimeve, për t’u bërë vend atraktiv për lëvizjen e lirë të njerëzve dhe për t’u bërë partner atraktiv në kontekstin rajonal”